Book blurb:

2002 Is Bitterkomix se 10de jaar. So 'n paar jaar gelede, tydens 'n "funksie", was Helmut Starcke (die ontwerper van die Fritz Deelman-reeks se boekomslae in die vroeë sewentigerjare) redelik verstom om te hoor dat Bitterkomix nog steeds bestaan. Dis natuurlik te danke aan die ondersteuners van Bitterkomix. Vir julle wil ons dus bedank. Dankie dat daar mense is wat nes ons onderdruk is deur patriargie en die
Apartheid-sisteem. Ons was almal gatvol. Dankie Here dankie God!
Hierdie uitgawe het 'n paar bydraes deur Franse kunstenaars. Hobopok ('n Franse stripkunstenaar wat vir ses maande in Suid-Afrika woonagtig was) het 'n kort stukkie geskryf oor die kunstenaars van Reunion (sien bl.32). Ek wil egter kortliks Pascal Rabaté se bydrae bespreek.
Pascal het in Suid-Afrika gekuier vir een maand aan die einde van 2001. Hy is uitgenooi deur die Franse Instituut van Suid- Afrika en het meeste van sy tyd in Melville en Yeoville in Johannesburg vertoef. Met sy terugkeer in Frankryk het hy besluit om 'n grafiese roman te teken oor sy ervarings in Suid-Afrika. Die stripverhaal is reeds voltooi en verskyn in April 2003 in Frankryk. Bitterkomix het die geleentheid gekry om die eerste 8 bladsye (in Engels) te publiseer.
Ek het vlugtig in Reunion in Desember 2002 met Pascal oor Welcome to Johannesburg gepraat. Pascal voel sterk dat die verhaal slegs 'n indruk van die stad is en dat hy geen oordeel wil maak nie. Die hoofkarakter beeld nie sy persoonlike opinie uit nie, maar is gebasseer op algemene Europese paranoia en "statistieke"..
Persoonlik vind hy Suid-Afrika energiek en ekstreem. Hy vind dat dinge hier baie kontrasterend is in vergelyking met "moderate" Europa. Ek het hom uitgevra oor sy vriende van Senegal wat hy in Yeoville elke dag besoek het. Ek het aan hom verduidelik hoe moeilik dit vir ons (as whities) is om net normaal swart vriende te hê. Daarop het hy geantwoord dat hy geen skuldgevoel het nie en dat daar dus nie 'n "barrier" tussen hom en swart mense is nie.
Ten slotte het hy genoem dat hy Suid-Afrika as 'n baie positiewe land ervaar het. Hy het dit vergelyk met die Ukraine waar hy ook vir 'n paar maande vertoef het, en sê dat laasgenoemde 'n ongelooflik deprimerende ervaring was. Mense in die Ukraine drink verskriklik en voel oor die algemeen bedruk en doen as of daar geen rede meer vir die lewe is nie. Suid-Afrika is egter "the land of opportunity."
Dankie aan ons gereelde medewerkers Lorcan White en Paddy Bouma. Ook dankie vir die werk van Claudette Schreuders (sy het laas 'n bydrae in Bitterkomix 3 gemaak) en Karlien de Villiers. Ons verwelkom al die Franse kunstenaars en hoop om nog baie van hul uitstekende werk te publiseer. Spesiale dank aan Catherine du Toit vir die vertaling van Chinese Kos.

-Mev. Bitter